تارت الفواكه

مساء الخيرعلى كل الحلوين اللي يبون يصيرون حريم ويطبخووووون

اليوم أنا جايبة لكم طريقة طبق حلو ومو صعب كثيروبالمقابل لذيذ ويواجه في حالة لو عندك زيارة رسمية أو ضيوف تحبين تكشخين عليهم،،
طبقي التعليمات بحذافيرها وهذا سر نجاح الطبخة ======> قاعدة أتفلسف كثير صح ،،
خذي اصبع زبده صغير وسيحيه وحطيه بزبدية وخليه لحد مايبرد،،بعدين اكسري عليه بيضة واخلطيهم بالخفاقة اليدوية ثم أضيفي كأس سكر واخلطي ثم أضيفي ملعقة صغيرة فانيليا واخلطي بعدين أضيفي كاس وثلث دقيق أبيض واعجنيها بيدك وآخر شي أضيفي ملعقة صغيرة مليانة باكنج باودر واعجني تماااااااام،،
*ملاحظة/ اتبعي نفس الترتيب السابق ولا تحطي شي قبل شي .
خذي صينية التارت وإمسحي كل حفرة بشوي زيت وكوري العجين كور صغيرة بحيث تشغل ثلثي الفتحة ( لايطلع العجين برا الكوب).
حطي في الخلاط علبة لبن زبادي+بيضة+فنجالين سكر(فنجان القهوة)+4حبات كيريواخلطيهم زين بالخلاط الكهربائي بعدين صبي طبقة بسيطة منه فوق العجينة اللي بالصينية وحمريها من الأسفل فقط،ولازم يكون الفرن حار وخليها لحد ماتشقر الأطراف تقريبا ربع إلى ثلث ساعة،،
طلعيها من الصينية وراح تطلع معك بسهولة وخليها حتى تبرد.

بعد ما تبرد حطي عليها أي نوع فاكهة تحبيه أنناس، كيوي، فراولة،توت أو أي نوع آخر.
آخر الشي الطبقة الملمعة وهي مهمة جداً لأنها تعطي اخراج رائع للتارت وهي عبارة عن موية الأنناس(علبة كبيرة)+ملعقة كبيرة سكر+ملعقة صغيرة نشاء، تحطيها على النار لحد ماتغلي بعدين تشيليها وتبردينها وتحطي على الفواكه اللي بالتارت طبقة خفيفة منها،،
وبالعااااااافية.